شوێن پێ لە لمدا

شوێن پێ لە لمدا

شەوێکیان خەوێکم بینی

بە درێژایی کەناری دەریادا دەڕۆیشتم لەگەڵ پەروەردگارمدا

لە تاریکی شەوە زەنگدا، ئاسمان دەردرەوشایەوە

بیرەوەرییەکانم وێنەکانی ژیانمی دەهێنایە بەرچاوم

هەموو جارێک لە لمەکەدا دوو شوێن پێم دەبینی

شوێن پێکانی خۆم و شوێن پێکانی پەروەردگارم

کاتێک کە دوا وێنە خۆی کێشایەوە لەبەرچاون

ئاوڕێکم دایەوە بۆ دواوە، داچڵەکیم کاتێک کە بینیم

لە زۆر جێگای رێگای ژیانمدا تەنها یەک شوێن پێ دیار بوو

ئەویش سەخترین کاتەکانی ژیانم بوون

بە پەرۆشەوە لە پەروەردگارم پرسی!

گەورەم، ئەو کاتەی باوەڕم هێنا و رێگەی تۆم گرتە بەر

پەیمانت پێدام، کە تۆ لە هەموو رێگایەکدا لەگەڵمدا بیت

بەڵام ئێستا دەبینم کە لە سەخترین کاتەکانی ژیانمدا

تەنها یەک شوێن پێ لە لمەکەدا دیارە

بۆچی بە تەنها منت بەجێهێشت، کاتێک کە من تۆم پێویستە؟

لێرەدا ئەو وەڵامی دامەوە:

منداڵە خۆشەویستەکەم!

من تۆم خۆش دەوێت، هیچ کاتێکیش بە تەنها بەجێت ناهێڵم

دڵنیابە لەوەی زیاتر لە کاتی پێویست و تەنگانەدا لەگەڵتدام

لەو شوێنەدا کە تەنها یەک شوێن پێ دەبینیت

ئەوە من تۆم بە باوەش هەڵگرتبوو.

نووسەر: Margaret Fishback

تەرجەمەی لە ئەڵمانییەوە: Schloma

چۆن بزانم کە دوای مردن بەدڵنیاییەوە دەڕۆم بۆ بەهەشت؟

چۆن بزانم کە دوای مردن بەدڵنیاییەوە دەڕۆم بۆ بەهەشت؟

ئایا دڵنیای لەوەی کە ژیانی ئەزەلی و جاویدانیت هەیە و کاتێک کە دەمریت دەچیتە بەهەشت؟ خودا دەیەوێت کە تۆ دڵنیا بیت لەوە! کتێبی پیرۆز دەڵێت: "ئه‌مانه‌م بۆ ئێوه‌ نووسی كه‌ باوه‌ڕتان به‌ ناوی كوڕی خودا هه‌یه‌، تاكو بزانن ژیانی هه‌تاهه‌تاییتان هه‌یه‌" (یۆحەنا ٥: ١٣).

وای دابنێ ئێستا لەبەردەم پەروەرگار راوەستاویت، پەروەدگار لێت دەپرسێت "بۆچی دەبێت بهێڵم بڕۆیتە بەهەشت؟ وەڵامی تۆ چی دەبێت؟ پێناچێت بزانی لە وەڵامدا چی بڵێیت. ئەوەی کە دەبێت بیزانێت ئەوەیە کە خودا خۆشی دەوێین و رێگەیەکی بۆ دابین کردووین کە دڵنیاین ژیانی هەمیشەییمان لەو شوێنە بەسەردەبەین. کتێبی پیرۆز بەم شێوەیە باسی دەکات: "چونكه‌ خودا به‌م جۆره‌ جیهانی خۆشویست، ته‌نانه‌ت كوڕه‌ تاقانه‌كه‌ی به‌ختكرد، تاكو هه‌ر كه‌سێك باوه‌ڕی پێ بهێنێت له‌ناو نه‌چێت، به‌ڵكو ژیانی هه‌تاهه‌تایی هه‌بێت" (یۆحەنا ٣: ١٦).

سەرەتا دەبێت ئەو کێشەیە بزانین کە رێگریمان دەکات لە چوونە بەهەشت. ئەمە کێشەکەیە، سروشتی گوناهباری ئێمە رێگە نادات پەیوەندیمان لەگەڵ یەزدان هەبێت. ئێمە بە سروشت و بە ئیختیاری خۆمان گوناهبارین. "لەبەرئەوەی هەموو گوناهیان کرد و لە شکۆی خودا کەوتن" (رۆما ٣: ٢٣). ئێمە ناتوانین خۆمان، خۆمان رزگار بکەین. "چونكه‌ به‌ نیعمه‌ت ڕزگارتان بوو به‌هۆی باوه‌ڕ، ئه‌مه‌ش له‌ خۆتانه‌وه‌ نییه‌، به‌ڵكو دیاری خودایه‌، به‌ كردار نییه‌، تاكو كه‌س شانازی نه‌كات" (ئەفەسۆس ٢: ٨، ٩). "چونكه‌ كرێی گوناه مردنه‌، به‌ڵام دیاری خودا ژیانی هه‌تاهه‌تاییه‌ له‌ عیسای مه‌سیحی خاوه‌ن شكۆمان" (رۆما ٦: ٢٣).

خودا پیرۆز و دادپەروەرە، بۆیە دەبێت سزای گوناه بدات، لەگەڵ ئەوەشدا خودا ئێمەی خۆش دەوێت و بەخشینی بۆ دەستەبەر کردووین، "منم رێگا و راستی و ژیان، کەس نایەت بۆ لای باوکەکە بەهۆی منەوە نەبێت" (یۆحەنا ١٤: ٦). مەسیح لەسەر خاچ لەبەر ئێمە خۆی کردە قوربانی، "چونكه‌ مه‌سیح ته‌نها جارێك له‌به‌ر گوناه مرد، بێتاوان له‌ پێناوی تاوانباران، تاكو له‌ خودامان نزیك بكاته‌وه‌" (١ پەترۆس ٣: ١٨). مەسیح لە مردن هەڵستێنرایەوە، "ئەوەی لە پێناوی گوناهمان بە گرتن درا و لە پێناوی بێتاوان کردنمان هەڵستێنرایەوە" (رۆما ٤: ٢٥).  

با بگەڕێینەوە سەر پرسیارە سەرەکییەکە، "چۆن بزانم کە دوای مردن بەدڵنیاییەوە دەڕۆم بۆ بەهەشت؟" ئەمە وەڵامەکەیە، "باوەڕ بە پەروەدگار عیسای مەسیح بهێنە، رزگارت دەبێت" (کردار ١٦: ٣١). "هه‌موو ئه‌وانه‌ی پێشوازییان لێی كرد، ئه‌وانه‌ی باوه‌ڕیان به‌ ناوی هێنا، مافی پێدان ببنه‌ منداڵی خودا" (یۆحەنا ١: ١٢). تۆ دەتوانی ژیانی جاویدانی و ئەزەلی وەکو دیارییەک وەربگریت. "دیاری خودا ژیانی هه‌تاهه‌تاییه‌ له‌ عیسای مه‌سیحی پەروەدگارمان" (رۆما ٦: ٢٣). هەر ئێستا دەتوانی دەست بکەیت بە ژیانێکی پڕ و واتادار. مەسیح دەفەرموێت: "من هاتووم تاكو ئه‌وان ژیانیان هه‌بێت، ژیانێكی پڕ" (یۆحەنا ١٠: ١٠). دەتوانی تاهەتایە لەگەڵ مەسیح لە بەهەشت بژیت، چونکە خۆی پەیمانی داوە و دەفەرموێت: "كه‌ ڕۆیشتم و شوێنم بۆ ئاماده‌كردن، دێمه‌وه‌ و ده‌تانبه‌مه‌ لای خۆم، تاكو ئێوه‌ش له‌و شوێنه‌ بن كه‌ من لێی ده‌بم" (یۆحەنا ١٤: ٣).

ئەگەر دەتەوێت مەسیح وەکو رزگارکار قبووڵ بکەیت و خودا لە گوناهەکانت خۆش بێت، دەتوانی بەم شێوەیەی خوارەوە نوێژ بکەیت. دەبێت بڵێین کە وتنی ئەم نوێژە یان هەر نوێژێکی دیکە رزگارت ناکات بەڵکو ئەوە متمانە بوونە بە مەسیح کە دەبێتە هۆی بەخشینی گوناهەکانت. ئەم نوێژە رێگەیەکە بۆ دەربڕینی باوەڕەکەت بە پەروەردگار و سوپاسکردنیەتی کە بەخشینی بۆ ئامادە کردوویت: "ئەی پەروەردگار، من دەزانم کە گوناهم بەرامبەر کردوویت هەربۆیە شایانی ئەوەم کە سزام بدەیت. بەڵام عیسای مەسیح سزاکەی منی گرتە ئەستۆی خۆی تاکو من بەهۆی باوەڕم لە ئەودا ببەخشرێم. متمانەم پێتە کە رزگارم دەکەیت. زۆر زۆر سوپاس ئەی خوداوەند بۆ نیعمەت و بەخشینە بێ هاوتاکەت! ئامین!"

مەسیح بەرەکەتدارتان بکات!

تەرجەمەی لە ئینگلیزییەوە:بنیامین بارامی

ژێدەر: gotquestions.org

کێ خودای درووست کردووە؟ خودا لە کوێوە هاتووە؟

کێ خودای درووست کردووە؟ خودا لە کوێوە هاتووە؟

بێباوەڕان و ئەوانەی گومانیان لە هەبوونی خودا هەیە بەگشتی دەپرسن، ئەگەر هەموو شتێک بنەمای هەیە، کەواتە خوداش دەبێت بنەمای هەبێت. بەڵام ئەگەر خودا بنەمای هەبوایە ئەوا ئەو کات پێمان نەدەوت خودا (هەروەها ئەگەر خودا خودا نەبێت، کەواتە خودا بوونی نییە.) ئەم پرسیارە هەندێک لە پرسیاری " کێ خودای خەلق کردووە، کێ خودای درووست کردووە" ئاڵۆزترە. هەموومان دەزانین کە هیچ شتێک لە خویەوە پەیدا نابێت. کەواتە ئەگەر خودا "شتێکە" ئەوا خودا پێویستە بنەمایەکی (سەرەتایەکی) هەبێت، راستە؟

پرسیارەکە هەندێک فەندوفێڵی هەیە چونکە ئەمە وادەکات بڕۆنە ناو گریمانەیەکی هەڵەوە و پێیان وابێت کە خودا لە شوێنێکەوە هاتووە و وادەکات کە پاشان بپرسن کە ئایا ئەو شوێنە کوێیە. وەڵامی ئەم پرسیارە ئەوەیە کە خودی پرسیارەکە بێمانایە. وەکو ئەوە وایە کە بپرسی "شین چ بۆنێکی هەیە؟" شین لە ناو ئەو بابەتانەدا نییە کە بۆنی هەیە، هەربۆیە پرسیارەکە مانای نییە و هەڵەیە. بە هەمان شێوە، خودا لە ناو ئەو بانەتانەدا نییە کە دروستکراون یان بنەمایان هەیە. خودا نە دروستکراوە و نە بنەمای هەیە، زۆر بە سادەیی، ئەو بوونی هەیە .

چۆن دەزانین کە خودا بوونی هەبووە و هەیە و دەبێت و درووست نەکراوە و بنەماشی نییە؟ ئێمە ئەمە دەزانین بەهۆی ئەوەی کە لە نەبوونەوە هیچ شتێک نایەتە بوون. کەواتە، ئەگەر زەمانێک هەبووبێت کە هیچ شتێک بوونی نەبووبێت، ئەوا ئێستا هیچ شتێک بوونی نەدەبوو. بەڵام شتەکان بوونیان هەیە. لەبەرئەوەی کە ناکرێت هیچ شتێک بە تەواوی بوونی نەبووبێت کەواتە دەبێت شتێک هەمیشە بوونی هەبووبێت و هەبێت. ئەو شتە هەمیشە زیندووەی کە بوونی هەبووە و بوونی دەبێت پێی دەڵێین "خودا".

خودا ئەو بوونە بێبنەمایەیە کە وای کردووە هەموو شتێکی دیکە بنەمای هەبێت. خودا ئەو دروستکارەیە کە دروستنەکراوە و ئەم دونیایە و هەموو شتێکی ناو ئەم دونیایەی دروست کردووە.

خودا بەرەکەتدارتان بکات.

تەرجەمەی لە ئینگلیزییەوە: بنیامین بارامی

ژێدەر: gotquestions.org

---